पुष १७ काठमाडौं । दोलखामा अन्तर्राष्ट्रियस्तरको फिल्म छायांकन सिटी बनाउन चलचित्र विकास बोर्डले प्रदेश सरकार र निजी क्षेत्रको साथ खोजेको छ भीमेश्वर नगरपालिकास्थित लाकुरीडाँडामा सिटी बनाउनेबारे अध्ययन गर्न यसै सप्ताहन्तमा बोर्ड अध्यक्ष भुवन केसीसहित सञ्चार तथा सूचना प्रविधि मन्त्रालयका पदाधिकारी त्यहाँ पुगेका थिए ।
बोर्ड अध्यक्ष केसीले आफूहरुले यो ठाउँमा बन्ने स्टुडियोमा चाँडै नेपाली र विदेशी फिल्म सुटिङ भएको हेर्न चाहेको बताए । ‘फिल्म सिटी एक छुट्टै संसार हो । मैले बलिउड र हलिउडमा देखेको फिल्म सिटी पनि यस्तै हो,’ केसीले भने ।
बोर्डको मात्र नभएर सरकारको रुचि नै सिटीमा भएको उनले बताए । ‘चलचित्रले मनोरञ्जनको माध्यम मात्र नभएर कला, संस्कृतिको विकास र पर्यटन प्रवद्र्धनमा भूमिका पनि खेल्छ । हामी छिट्टै नै नेपाली र विदेशी फिल्म यो सिटीमा छायांकन भएको हेर्न चाहन्छौं,’ उनले भने ।
अध्यक्ष केसीले फिल्ड भिजिट गरेपछि आफूले फिल्म सिटी निर्माणको क्षेत्रलाई सोचेको भन्दा निकै फरक भौगोलिक अवस्थामा पाएको बताए । ‘मैले यसअघि यो सिटीलाई सामान्य रुपमा बुझेको थिएँ । बोर्ड अध्यक्ष बनेर आइसकेपछि विस्तृत अध्ययन र फिल्ड भिजिटमा पुगेपछि निकै विशाल पाएँ । हामीले सुनेको आधारमा बनाउँदै आएको धारणा भन्दा निकै वृहत स्थान रहेछ,’ उनले भने ।
केसीले निकै ठूलो योजना भएको हुँदा तुरुन्तै सम्पन्न नहुने बताउँदै सहकार्यको लागि सबै तहका सरकार र निजी क्षेत्रलाई आह्वान गरे ।
छलफलमा नगरपालिकाका प्रमुख ईश्वरनारायण मानन्धरले दोलखावासीले फिल्म सिटीलाई सपनाको रुपमा हेरेको बताए । परियोजना सुरु भएको लामो समय बितिसकेको भए पनि सोचेअनुरुप प्रगति नदेखिएको बताउँदै उनले भने, ‘लगानीको समस्याका कारण काम थालनी गरी बेवारिसे रुपमा छोडिन थालेपछि सरकारकै अन्य मन्त्रालयले यसभित्रै आँखा लगायो । सरकारी संयन्त्रहरु कुन अवस्थामा रहेछन् भन्ने कुरा फिल्म सिटीको कथाव्यथाले बताउँछ ।’
बोर्डले केही वर्ष पहिले दुई हजार रोपनी जग्गामा करिब १६ अर्ब लगानीको डीपीआर तथा मास्टरप्लान तयार गरेको थियो । जसअन्तर्गत विद्युतको प्रसारण लाइन तान्ने, स्टुडियोभित्र पर्ने ६ किलोमिटर बाटो कालोपत्रे गर्ने, प्रवेशद्वार तथा सूचना केन्द्र तथा गेस्ट हाउसको लागि तीनवटा भवन निर्माणको काम अन्तिम चरणमा पुगेको देखिएको छ ।