आश्विन २, असोज : कैलाली जिल्ला खेलकुद विकास समितिले मंगलबार कराते खेलाडीहरुलाई सम्मान गरेको छ । गत बर्ष पर्वतको कुश्मामा सम्पन्न नवौं राष्ट्रिय खेलकुद प्रतियोगिता अन्तर्गत कराते प्रतियोगिताका पदक बिजेता खेलाडीहरुलाई सुदूरपश्चिम् प्रदेश सरकारका सामाजिक विकास मन्त्री झपटबहादुर साउदले नगद पुरस्कार सहित सम्मान गरेका छन् । स्वर्ण पदक बिजेता आनन्द कामी र प्रतियोगितामा ३ वटा कास्य पदक जितेकी बर्षा साउदले सम्मान स्वरुप १५ हजार रुपैयाँ नगद प्राप्त गरिन् । सो प्रतियोगितामा २ वटा कास्य पदक बिजेता गरिमा मल्लले १० हजार रुपैया, १–१ कास्य पदक जितेका प्रदीप बैजाली मगर, खडक मगर, पुष्पा मडै, लक्ष्मी खडायत र अञ्जली चौधरीले जनही पाँच–पाँच हजार प्राप्त गरेका छन् ।
सो कार्यका लागि हाल अमेरिकामा रहेका अन्तर्राष्ट्रिय कराते खेलाडी जनक सिंह खड्काले रु २५ हजार रुपैयाँ र कैलाली जिल्ला कराते महासंघका पुर्व अध्यक्ष कर्ण बहादुर चन्दले दश हजार रुपैयाँ आर्थिक सहयोग गरेका थिए भने बाँकी रकम धनगढी कराँते एकेडेमीको कोषले व्यहोरेको आयोजकले जानकारी दिएको छ ।
यस अघि मन्त्री साउदले खेलकुद परिसरमा बृक्षारोपण गरेका थिए । उक्त कार्यक्रममा बिगत ६ दिन देखि संचालित कराते सेमिनारका प्रशिक्षार्थीहरुलाई प्रमाणपत्र समेत बितरण गरिएको थियो । सितोरियो करातेका ९ औं डान वरिष्ठ प्रशिक्षक केइजी तोमियामाद्वारा ५० जना कराते खेलाडीहरुलाई भाद्र २८ गते देखि दैनीक ६ घण्टा प्रशिक्षण गराइएको थियो । उनी सन् २००६ देखि प्रति बर्ष नेपाल आएर कराते प्रशिक्षण गर्दै आएका छन् । तर कोरोनाको प्रकोपले गर्दा सन् २०२० पछि पहिलो पटक नेपाल आएका हुन् ।
कैलाली जिल्ला खेलकुद समितिका अध्यक्ष ललित खत्रीको सभापतित्वमा सम्पन्न भएको कार्यक्रममा सुदूरपश्चिम् क्षेत्रिय खेलकुद विकास समितिका पदाधिकारी र कैलाली जिल्ला खेलकुद विकास समितिका कार्यालय प्रमुख र प्रशिक्षकहरु तथा विभिन्न खेलका खेलाडीहरुको उपस्थिति रहेको थियो ।
कार्यक्रममा विरुवाको सुरक्षाका लागि ट्री गार्ड उपलब्ध गराउने सि. पी. अस्पतालका संचालक रमेस पाण्डेयलाई पनि सम्मानित गरिएको थियो । कार्यक्रममा मन्त्री साउदले सुुदूरपश्चिमको खेलकुदमा सुधारको खाचो रहेको र आफुले चाडैं नै सुधार गर्ने प्रतिबद्धता व्यक्त गरेका थिए । कार्यक्रम कैलाली जिल्ला खेलकुद समितिको कभर्डहलमा मंगलबार सम्पन्न भएको थियो ।