धनगढी फागुन २६, नेपाली कांग्रेस सुदूरपश्चिम प्रदेशको प्रथम प्रदेश सम्मेलनमा बोल्ने कांग्रेसका नेताहरुले सभापति शेरबहादुर देउवाको गुणगान गाएर प्रशंसा मात्र गरेका छन् ।
नेपाली कांग्रेसका उपसभापति पूर्णबहादुर खड्काले सभापति देउवा असम्भवलाई सम्भवमा बदल्ने एक मात्र नेतृत्व भएको प्रशंसा गरे ।
कांग्रेसका महामन्त्री गगन थापाले देउवाको प्रशंसा गर्दै भने–गणतन्त्र नेपाललाई सहि मार्गमा डोर्याउन महत्वपूर्ण भूमिका खेलेको बताए ।
अर्का महामन्त्री विश्वप्रकाश शर्माले सभापति देउवाले राष्ट्रिय राजनीतिमा गम्भिरताका साथ नेतृत्वदायी भूमिका खेलेको बताए ।
नेपाली कांग्रेसका सहमहामन्त्री जीवन परियारले सभापति देउवाको वरिपरि नै मुलुकको राजनीति घुमिरहेको बताए । अर्का सहमहामन्त्री भिष्मराज आङबम्बेले सभापति देउवा नेपालको राजनीतिमा रोलमोडल भएको जिकिर गरे ।
यस्तै सहमहामन्त्री महालक्ष्मी उपाध्याय डिनाले शेरबहादुर देउवा विपीका सबैभन्दा विश्वासिला पात्र भएको बताइन् । उनले सुदूरपश्चिम पहिलो पटक आउँदा डडेल्धुरासम्म पीच सडकको यात्रा गरेको समेत भन्न भ्याइन् ।
नेपाली कांग्रेसका नेता कृष्णप्रसाद सिटौलाले सम्बोधनका क्रममा नै देउवा सिंगो नेपाली कांग्रेसका अभिभावक भएको बताए । उनले एमाले र माओवादी पार्टीको पनि देउवाले अभिभावकको भूमिका निर्वाह गर्दै आएको दाबी गरे ।
सभापति देउवाले सुदूरपश्चिमको समग्र विकासका लागि महत्वपूर्ण भूमिका खेल्दै आएको गुणगान गरेका छन् । सम्मेलनमा बोल्ने कांग्रेस नेता सशांक कोइराला लगायत २३ जनाले सभापति देउवाको गुणगान गाएर भाषण गरेक थिए ।
