आश्विन १७, बझाङको चैनपुर केन्द्रविन्दु बनाएर मंगलबार दिउँसो गएको भुकम्प संगै सुदूरपशिचममा पछिल्लो ६ महिनाको अवधिमा मात्रै १५ वटा भुकम्पको धक्का गएको छ ।
वैशाखयता मात्रै सुदूरपश्चिममा साना ठुला गरी चार म्याग्निच्युड माथिका १५ वटा भूकम्प मापन भएको राष्ट्रिय भूकम्प मापन तथा अनुसन्धान केन्द्रले जनाएको छ । सो अवधिमा सुदूरपशिचम बाहेकका क्षेत्रलाई केन्द्रविन्दु बनाएर ७ वटा थप भुकम्पको धक्का महशुश हुँदा देशभर ६ महिनामा २२ वटा भुकम्प गएका केन्द्रले जनाएको छ ।
मंगलबार दिउँसो बझाङको चैनपुर केन्द्रबिन्दु भएर ५ शदमलव ३, ६ दशमलव ३ र ४ दशमलव १ म्याग्नेच्युड गरी तीन वटा भूकम्प गएको केन्द्रका प्रमुख लोकविजय अधिकारीले जानकारी दिए । ३ बजेर ६ मिनेट जाँदा बझाङको चैतपुर केन्द्रबिन्दु भएर ६.३ म्याग्निच्युडको भूकम्प गएको थियो । त्यसअघि २ बजेर ४० मिनेटमा पनि बझाङकै तालकोट आसपास केन्द्रबिन्दु भएर ५.३ म्याग्निच्यूडको भूकम्प गएको थियो । त्यस्तै ३ बजेर ४५ मिनेट र ४ बजेर २८ मिनेटमा थप दुई वटा ४.१ म्याग्निच्युडको पराकम्प गएको केन्द्रको भनाइ छ । यसैगरी ४ बजेर ३१ मिनेटमा ४ दशमलव ३ म्याग्निच्युडको अर्को भूकम्पको धक्का पनि मापन भएको छ ।
भूकम्पबाट निजी र सार्वजनिक भौतिक संरचनामा क्षति भएपनि हालसम्म मानवीय क्षति नभएको प्रमुख जिल्ला अधिकारी नारायणप्रसाद पाण्डेयले जानकारी दिएका छन् । यसअघि वैशाख १० गते बाजुरालाई केन्द्रबिन्दु बनाएर ४.१ म्याग्निच्युडको भूकम्प गएको थियो । बाजुरामै केन्द्रबिन्दु बनाएर वैशाख १४ मा ४.९, वैशाख १५ मा ५.९, ४.१ मा, २१ मा ४.१ र वैशाख २८ मा ४.३, जेठ ८ गते ४.१ र जेठ २९ गते बाजुरामै केन्द्रबिन्दु भएर भूकम्प गएको थियो । यसैगरी सुदूरपश्चिमको बझाङलाई केन्द्रबिन्दु बनाएर जेठ १० गते ४.५ म्याग्निच्युडको भूकम्प गएको थियो । असार ५ गते दार्चुलालाई केन्द्रबिन्दु बनाएर ४.० रेक्टर स्केललको भूकम्प गएको केन्द्रको तथ्याङ्कले देखाएको छ ।
सुदूरपश्चिमबाहेक वैशाख १८ मा हुम्लालाई केन्द्रबिन्दु बनाएर ४.०, जेठ ७ गते रुकुम पूर्वमा ४.१, असार ८ गते लमजुङमा ४.०, असार २८ मा हुम्लामा ४.६ , साउन ३ गते कास्कीलाई केन्द्रबिन्दु बनाएर ४.० म्याग्निच्युडको भूकम्प गएको थियो । यसैगरी भदौ १५ गते पूर्वी नेपालको भोजपुरलाई केन्द्रबिन्दु बनाएर ४.० र पाँचथरलाई केन्द्रबिन्दु बनाएर ४.१ म्याग्निच्युडको भूकम्प गएको मापन केन्द्रको तथ्याङ्कले देखाएको छ ।
यसरी हेर्दा पछिल्लो ६ महिनामा नेपालमा २२ वटा भूकम्पको धक्का गएको देखिन्छ ।