महादेव गिरी संवाददाता
बाजुरा असोज ३, बाजुराको त्रिवेणी नगरपालिका जोड्ने बुढीगङ्गा नदीमा चालु आर्थिक वर्षमा दुई वटा पक्की पुल निर्माण गरिने भएका छन । पुल निर्माण हुने भएपछि त्रिवेणी नगरपालिकाका स्थानीय बासी खुसी भएका छन् । बुढीगङ्गा नदीमा पक्की पुल नहुँदा स्थानीयले जोखिम खेप्दै आएका थिए ।
बर्खाको समय दैनिक उपभोग्य सामग्री तल माथी ढुवानी गर्न निकै सास्ती खेप्दै आएका स्थानीय नगरवासीले पुल निर्माण भएमा धेरै कुराको सहज हुने बताएका छन् । त्रिवेणी नगरपालिका –८, रत्न माविका शिक्षक मानबहादुर ऐडीले भने “हिउँदमा गाडी गुड्ने गाउँबस्ती बर्खाको समय सुनसान हुन्छन् ।” पुलको अभावमा यातायातका साधन बुढीगङ्गा नगरपालिका–६ को बाम्कामै रोकिने गरेका छन् । पुल निर्माण हुन लागेपछि बल्ल यहाँका स्थानीयको मुहारमा खुसी आएको त्रिवेणी नगरपालिका–८ का वडा अध्यक्ष गगनजङ्ग बुढाले बताए । भने
नगरपालिका प्रमुख कर्णबहादुर थापाले सडक डिभिजन कार्यालय र पूर्वाधार विकास कार्यालय अछामले यो वर्ष बुढीगङ्गा नदीमा दुई वटा पक्की पुल निर्माणको काम सुरु गरेको जानकारी दिए । बुढीगङ्गा वडा नम्बर १ र त्रिवेणी नगरपालिका वडा नम्बर ९ को बिचमा रहेको रिन्टे खोला र बुढीगङ्गा वडा नम्बर ६ र त्रिवेणी वडा नम्बर ८ को बिचमा पर्ने मौरेमा पक्की पुल निर्माण हुने नगरपालिका प्रमुख कर्णबहादुर थापाले बताए ।
बुढीगङ्गा वडा नम्बर २ र त्रिवेणी वडा नम्बर ९ को बिचमा पर्ने रिन्टे खोला ८० मिटर पुल निर्माणका लागि १० करोड रुपियाँ र बुढीगङ्गा वडा नम्बर ६ र त्रिवेणी नगरपालिका वडा नम्बर ८ को बिचमा पर्ने मौरेमा ११० मिटर लम्बाइ पुल निर्माणका लागि १६ करोड रुपियाँ विनियोजन भएको सडक डिभिजन कार्यालय अछामका प्रमुख दिवस बस्नेतले बताए । त्यसै गरी त्रिवेणी वडा नम्बर ८ र ४ को बिचमा रहेको मालागाड खोलामा पनि ७५ मिटर लम्बाइको पक्की पुल बन्ने भएको छ ।