माघ ८ कम्बोडियामा आफू बसेको होटलमा आगलागी भएपछि झ्यालबाट हाम फाल्दा ज्यान गुमाएका झापाका निराकर पाण्डेको शव झापा ल्याइएको छ ।
कम्बोडियामा १४ पुसमा भएको भीषण आगलागीमा ज्यान बचाउन १२ औं तलाबाट हाम फाल्दा मृत्यु भएका उनको शव शुक्रबार काठमाडौं आइपुगेको थियो । शनिबार दिउँसो साढे १२ बजे विर्तामोड निवासमा शव ल्याइएलगत्तै कनकाई नदीको तटमा अन्तिम संस्कार गरिएको छ ।
बीबीसीका अनुसार घटना भएको दिन राति ११ बजेदेखि पाण्डे बसेको होटल क्यासिनोमा आगलागी भएको थियो । पाण्डेले मृत्यु हुनु अघि परिवारलाई बताए अनुसार आगो लागेपछि उनलाई करिडोरमार्फत माथि जान सुझाइएको थियो । तर, करिडोरमा समेत आगो लागि सकेकाले झ्यालबाट हाम फाल्नुको विकल्प थिएन ।
ज्यान जोगाउन भोलिपल्ट बिहान ४ बजे हामफाल्दा उनको मृत्यु भएको थियो । पाण्डे व्यवसायको सिलसिलामा भिजिट भिसामा कम्बोडिया गएका थिए ।