महादेव गिरी संवाददाता
धनगढी साउन १८, सामाजिक परिचालकहरुको लागि आधारभूत मनोसामाजिक सहयोग तथा लैंगिक रुपान्तरण सम्बन्धी १० दिने तालिम धगढीमा सुरु भएको छ । मनोसामाजिक सहयोग र लैंगिक रुपान्तरण गर्ने उद्येश्यले धनगढी उपमहानगरपालिकाको आयोजनामा तालिम सुरु भएको हो ।
तालिमको उद्घाटन समारोहका अध्यक्ष एवम् धनगढी उपमहानगरपालिकाको नगर उपप्रमुख कन्दकला रानाले परिवर्तनका लागि सामाजिक र मानविय विकास हुनुपर्ने बताईन् । सामाजिक र मानविय विकास भएन भने भौतिक विकास अपुरो हुने भन्दै धनगढी उपमहानगरपालिका सामाजिक र मानविय विकासका पक्षमा रहेको अध्यक्ष रानाले बताईन् । लैंगिक हिंसा पीडितलाई सहयोग गर्ने, मनोसामाजिक समस्यामा परेकाहरुलाई मनोसामाजिक परामर्श सेवा दिने काम भईरहेको उनले बताईन् ।
रानाले भनिन् ‘ समुदायमा काम गर्दै आएका सामाजिक परिचालकहरुले आधारभूत मनोसामाजिक सहयोगको बारेमा थाहा पाएपछि काम गर्न सजिलो हुन्छ भनेरै नै तालिमको आयोजना गरिएको हो । अहिले समाजमा मनोसामाजिक समस्या बढ्दै गएको छ । मनोसामाजिक समस्या न्यूनीकरण गर्न र व्यक्तिको जीवनमा सकारात्मक परिवर्तन ल्याउन मनोसामाजिक सहयोगको भूमिका धेरै महत्वपूर्ण हुन्छ ।’
लैंगिक हिंसाका कारण धेरै महिलाहरु पीडित बनेकाछन् । हिंसा पीडित महिलालाई सहयोग गर्न र न्याृय प्रदान गर्नका लागि सुरक्षित आवास गृह संचालन गरी आश्रय दिने काम भईरहेको छ । लैंगिक हिंसाका घटनालाई रोकथाम र प्रतिकार गर्न धनगढी उपमहानगरपालिकाले लैंगिक विभेदमा आधारित हिंसा रोकथाम तथा प्रतिकार्य परियोजना संचालन गरेको रानाले बताईन् ।
धनगढी उपमहानगरपालिकाको नेतृत्वमा स्वीस विकास सहयोग, नर्वेजिएन दुताबास र संयुक्त राष्ट्रसंघीय जनसंख्या कोष यूएनएफपिएको सहयोगमा लैंगिक विभेदमा आधारित हिंसा रोकथाम तथा प्रतिकार्य परियोजना दुईवर्ष देखि संचालन भई रहेको छ ।
तालिममा सामाजिक परिचालक र वडा सदस्य गरी २० जनाको सहभागिता रहेको छ । तालिमको सहजीकरण सीएमसी नेपालका मनोसामाजिक सुपरभाईजर एवम् मनोविद् यभन श्रेष्ठ, भिएसओका सुदरूपश्चिम प्रदेश संयोजक प्रतिभा चौधरी र सीएमसी नेपालका मनोसामाजिक परामर्शकर्ता धनराज विकले गरेकाछन् । साउन १७ गतेदेखि सुरु भएको तालिम साउन २६ गतेसम्म संचालन हुने महिला विकास अधिकृत पंकजा जोशीले बताईन् ।