धनगढी– मंसिर ९, भोलिदेखि लैङ्गिक हिंसा विरुद्धको १६ दिने अभियान सुरु हुँदैछ । यो अभियान कैलालीमा पनि मनाइँदै छ । उक्त अभियानमा कैलालीका २२ वटा गैह्र सरकारी संस्थाले १ सय ५३ वटा कार्यक्रम गर्ने भएका छन् ।
अभियानको क्रममा ¥याली, जनचेतनामूलक कार्यक्रम, अन्तरक्रिया, अभिमुखीकरण, सडक नाटक, संवादलगायतका कार्यक्रम गरिनेछ । अभियानमा कैलालीका २२ वटा गैह्र सरकारी संस्थाले १ सय ५३ वटा कार्यक्रम सम्पन्न गर्न २८ लाख बढी रुपैयाँ खर्च गर्दैछन् ।
गैह्र सरकारी संस्थाले लैङ्गिक हिंसा विरुद्धको १६ दिने अभियानका क्रममा हरेक वर्ष लाखौं रुपैयाँ खर्च गर्दै आएका छन् । तर रोचक के छ भने गैह्र सरकारी संस्थाले सञ्चालन गर्दै आएको सो अभियान सफल पार्न महत्वपूर्ण भूमिका खेल्दै आएको मिडियामा एक रुपैयाँ पनि बजेट विनियोजन भने गरिएको देखिएन् ।
यसले उनीहरुले गर्दै आएको खर्चको पारदर्शीमा प्रश्न उठेको नेपाल पत्रकार महासंघका जिल्ला अध्यक्ष हिमाल जोशीले बताए । उनले सचेतनामूलक कार्यक्रम भएकोले मिडिया क्षेत्रमा बजेट विनियोजन नगरिएपनि अभियान सफल पार्न हाम्रो दायित्व भएको बताए ।
‘हामी सबैको प्रतिबद्धता : लैङ्गिक हिंसा अन्त्यको लागि एक्यबद्धता’ राष्ट्रिय नाराका साथ भोलि (मङ्सिर १० गते)देखि लैङ्गिक हिंसा विरुद्धको १६ दिने अभियान सञ्चालन हुनु पूर्व आइतबार आयोजित पत्रकार सम्मेलनमा पनि बजेटको विषयलाई लिएर प्रश्न उठाएको अध्यक्ष जोशीको भनाइ छ ।
आइतबार गैह्र सरकारी संस्था महासंघ सुदूरपश्चिम प्रदेश समितिले धनगढीमा पत्रकार सम्मेलन गर्दै विविध कार्यक्रमका साथ लैङ्गिक हिंसा विरुद्धको १६ दिने अभियान मनाइने जनाएको छ । १६ दिने अभियानको अवधिमा कैलालीका १३ र कञ्चनपुरको एक पालिका गरि १४ वटा पालिकामा विभिन्न कार्यक्रम गरिने महासंघका प्रदेश अध्यक्ष देवीप्रसाद खनालले जानकारी दिए ।