११ जेठ, काठमाडौं — भारतमा औसतभन्दा एक हप्ता अघि नै मनसुन प्रवेश गरेपछि नेपालमा पनि यस वर्ष चाँडै मनसुन भित्रिने सम्भावना रहेको मौसमविद्हरूले बताएका छन्। सामान्यतः भारतको केरलामा १ जुन र नेपालमा १३ जुनमा मनसुन प्रवेश गर्ने गर्छ। तर, यसपटक भारतमा २४ मे (जेठ १०) मै मनसुन प्रवेश गरेको छ।
भारतको मौसम विभागले मनसुन केरलामा भित्रिएको जानकारी दिँदै राजधानी नयाँदिल्लीलगायत विभिन्न ठाउँमा भारी वर्षा भएको जनाएको छ। २४–२६ मेसम्म भारतका धेरै क्षेत्रमा भारी वर्षाको सम्भावना रहेको बताउँदै सतर्क रहन आग्रह गरिएको छ। भारतीय सञ्चारमाध्यमका अनुसार यो पछिल्लो १६ वर्षयताकै सबैभन्दा चाँडो प्रवेश गर्ने मनसुन हो।
नेपालका वरिष्ठ मौसमविद् मीनकुमार अर्यालका अनुसार भारतमा मनसुन भित्रिएको मितिबाट १०–१५ दिनभित्र नेपालमा पनि प्रवेश गर्ने चलन छ। “जलवाष्पयुक्त हावाको गतिशीलताले हेर्दा यस वर्ष नेपालमा मनसुन ढिलो नहुन सक्छ,” उनले बताए। यद्यपि, हालसम्म पश्चिमी वायु र स्थानीय वायुले प्रभाव जमाइरहेकाले अझ केही दिन लाग्न सक्ने उनको भनाइ छ।
बंगालको खाडी र अरब सागरबाट आएको जलवाष्पयुक्त हावाको प्रभावले गर्दा हाल नेपालका विभिन्न स्थानमा दैनिक हल्का देखि मध्यम वर्षा भइरहेको छ। आज पनि काठमाडौं उपत्यकालगायतका स्थानहरूमा वर्षाको सम्भावना छ।
नेपालमा मनसुन सामान्यतः १३ जुनमा भित्रिएर २ अक्टोबरमा समाप्त हुने गर्दछ। मौसम विभागले यस वर्ष मनसुनमा औसतभन्दा बढी वर्षा र तापक्रम हुने अनुमान गर्दै आएको छ। धेरै वर्षाले जनधनको क्षति हुने सम्भावना बढी हुने भएकाले पूर्वतयारी र सतर्कता अपनाउन विभागले आग्रह गरेको छ।