१७ चैत, प्रधानमन्त्री थ्री नेसन्स कपको उपाधिका लागि नेपालले आज लाओससँग फाइनल खेल खेल्दैछ । फाइनल खेल साँझ साढे ५ बजे त्रिपुरेश्वरस्थित दशरथ रंगशालामा सुरु हुनेछ ।
फिफा मान्यता प्राप्त मैत्रीपूर्ण खेलको अवधी सकिएकाले आज हुने नेपाल र लाओसबीचको फाइनल खेल अनौपचारिक हुनेछ । एउटा फिफा मितिमा दुई वटा मात्र अन्तर्राष्ट्रिय मैत्रीपूर्ण खेल खेल्न पाउने नियम अनुसार आजको खेल औपचारिक नहुने भएको हो ।
यद्यपि दुवै टोलीले यस खेललाई महत्वका साथ लिएका छन् । फाइनललाई फाइनलकै रुपमा लिँदै उपाधि जित्नका लागि खेल्ने दुवै टिमका कप्तान र प्रशिक्षकले बताइसकेका छन् ।
पछिल्लो समय राष्ट्रिय टिमबाट खेल्ने अधिकांश खेलाडीहरु विदेशिँदा नेपाली टोलीमा अहिले नयाँ खेलाडीहरुको बाहुल्य छ । त्यसैले नेपालका नयाँ प्रशिक्षक भिन्सेन्जो अल्बर्टो एनेस आफ्नो पहिलो प्रतियोगितामै उपाधि जितेर सुखद सुरुवात गर्ने सोचमा छन् । कप्तान किरण कुमार लिम्बु, रोहित चन्द, अनन्त तामाङ, नवयुग श्रेष्ठ र भरत खवास मात्रै अनुभवी खेलाडीको रुपमा छन् ।
अन्जन भुटान विरुद्धको खेलमा घाइते भएपछि दोस्रो हाफमा मैदान छाडेका थिए । उनले फाइनल खेल्ने सम्भावना कम छ । यस्तै पुजन उपरकोटी दोहोरो पहेँलो कार्डका कारण फाइनलमा खेल्ने छैनन् ।
६ नयाँ खेलाडीलाई टिममा राखेका एनेसले पहिलो खेलमै चार खेलाडी सनिश श्रेष्ठ, मणि कुमार लामा, दीपकराज सिंह ठकुरी र सुमित श्रेष्ठलाई डेब्यु गराइसकेका छन् ।
पहिलो पटक टिममा परेका गोलकिपर अभिषेक बराल र डिफेण्डर पदम भट्टराईले भने यस पटक डेब्यु गर्न पाएनन् ।