११ जेठ, धनगढी — शनिबार राति धनगढीस्थित कैलाली भन्सार कार्यालयभित्र भन्सार प्रमुख अनन्त तिमिल्सिनामाथि नगर प्रहरीको टोलीले कुटपिट गरेको खुलासा भएको छ।
नगर प्रहरीका प्रमुख प्रहरी निरीक्षक लक्ष्मणसिंह धामी नेतृत्वको टोलीले राति करिब १० बजेतिर कार्यालयमा प्रवेश गरी तिमिल्सिनामाथि धकेल्दै कुटपिट गरेको सीसीटीभी फुटेजमा देखिएको छ।
फुटेजअनुसार एक जना मात्र नगर प्रहरी पोशाकमा थिए भने अन्य सादा पोशाकमा रहेका थिए। तिमिल्सिनामाथि हातपात गर्नेमा प्रहरी निरीक्षक धामी स्वयं रहेको बताइएको छ।
यता धामीले भने कुटपिटको आरोप अस्वीकार गर्दै तिमिल्सिना अत्यधिक मदिरा सेवनको अवस्थामा रहेको दाबी गरेका छन्। उल्टै आफूहरूमाथि दुर्व्यवहार भएको भन्दै उनले हातपातको घटना अस्वीकार गरे।
धामीले भन्सार प्रमुख भएको नचिनेकाले अनधिकृत व्यक्ति प्रवेश गरेको शंका लागेर कार्यालय प्रवेश गरेको बताएका छन्। तर सीसीटीभी फुटेजमा भने कुटपिट भएको दृश्य प्रस्ट देखिन्छ।
शहरमा तीव्र गतिमा जिप चलाइएको सूचना पछि नगर प्रहरीको टोली कैलाली भन्सारसम्म पुगेको थियो।
घटनापछि जिल्ला प्रहरी कार्यालय कैलालीका प्रमुख एसपी बाल नरसिंह राणाले थप जानकारी संकलन भइरहेको बताए।
भन्सार प्रमुख तिमिल्सिनाले भने घटनाको विस्तृत प्रतिवेदन तयार पारेर भन्सार विभागमा पठाउने तयारी गरेका छन्। सूचना अधिकारी खेम अर्यालका अनुसार प्रतिवेदनमार्फत संलग्न नगर प्रहरीमाथि कारबाहीको माग गरिने छ।