माघ १६, विभिन्न आन्दोलनमा प्रजातन्त्र, स्वतन्त्रता, राजनीतिक अधिकार लगायतका लागि जीवन आहुति दिने शहीदहरूको सम्झनामा आज विविध कार्यक्रम गरी शहीद दिवस मनाइँदै छ ।
दिवसका अवसरमा आज सार्वजनिक बिदा पनि दिइएको छ । प्रत्येक वर्ष माघ १० गतेदेखि १६ गतेसम्म विभिन्न शहीदहरूको सम्झनामा शहीद सप्ताह मनाई, १६ गतेका दिन विभिन्न कार्यक्रम गरी शहीद दिवस मनाइन्छ । गत साता टेकुस्थित पचलीमा रहेको शहीद शुक्रराज शास्त्रीको सालिकमा माल्यार्पण गर्दै शहीद सप्ताह सुरू भएको हो ।
जहानियाँ राणा शासन विरुद्ध स्वतन्त्रताको माग गर्दा विसं १९९७ मा शुक्रराज शास्त्रीलाई माघ १० गते काठमाडौँको टेकुस्थित पचलीमा, माघ १३ गते धर्मभक्त माथेमालाई सिफलमा र गङ्गालाल श्रेष्ठ एवं दशरथ चन्दलाई माघ १५ गते शोभा भगवतीमा राणा शासकले मृत्युदण्ड दिएका थिए ।