भाद्र २६: धनगढीमा बुधवारदेखि दोस्रो एमसी कप खुल्ला भलिबल प्रतियोगिता सुरु भएको छ । ऐश्वर्य बहुमुखी क्याम्पस अन्तरगत स्वतन्त्र विद्यार्थी युनियनले आयोजना गरेको प्रतियोगिताको एक कार्यक्रमकाबिच सामाजिक विकास मन्त्री मेघराज खड्काले उद्घाटन गरेका थिए ।
उद्घाटन समारोहमा मन्त्री खड्काले खेलकुदबाट सुदूरपश्चिमको नाम रोशन गरिरहेको बताए । उनले एमसी कपले यहाँका खेलाडीहरूको पहिचान हुने समेत बताएका थिए । ‘यो क्षेत्रमा थुप्रै क्षमतावान् खेलाडीहरू हुनुहुन्छ यो प्रतियोगिताले उहाँहरूलाई राष्ट्रिय अन्तर्राष्ट्रिय स्तरमा पुराउन मद्दत पुग्छ’ उनले भने, ‘यसले सुदूरपश्चिमको गौरवलाई बढाएको छ । ’ लागु औषध प्रयोगकर्ता बढिरहेको भन्दै मन्त्री खड्काले यस्ता सिजनशील कार्यक्रमले युवाहरूलाई पनि सहि बाटेमा लैजान मद्दत पुग्ने विश्वास व्यक्त गरेका थिए ।
खेलकुदले शारीरिक र मानसिक स्वास्थ्य पनि टेवा पुग्ने उनले बताए । कार्यक्रममा धनगढी उपमहानगरपालिकाका पूर्व मेयर समेत रहेका ऐश्वर्य बहुमुखी क्याम्पस सञ्चालक समिति अध्यक्ष नृप वडले सुदूरपश्चिमलाई खेलकुदको रुपमा अगाडि बढाइरहेको बताएका थिए । हरेक विधाका खेलकुदमा सुदूरपश्चिमका खेलाडीको वर्चस्व रहेको भन्दै उनले विद्यालय स्तरमा आयोजना हुने खेलकुदले खेलाडीहरूको अझै मनोबल बढ्ने र अवसर पाउने बताए । प्रदेश सभा सदस्य धर्मराज पाठकले स्वबीयुले गरेको प्रतियोगिताले खेलाडीहरूलाई प्रवर्द्धन गर्ने विश्वास व्यक्त गरेका थिए ।
खेलबाट प्रदेशको नाम रोशन भएको सांसद पाठकको भनाइ थियो । ऐश्वर्य बहुमुखी क्याम्पसमा स्वबीयुले आयोजना गरेका जस्ता खेलकुदहरू अन्य कलेजहरूमा पनि आयोजना गर्न आवश्यक रहेको बताएका थिए । आजबाट सुरु भएको प्रतियोगितामा सुदूरपश्चिम भित्रका राष्ट्रिय स्तरसम्मका खेलाडीहरूको पनि सहभागिता रहेको छ । प्रदेशका विभिन्न क्याम्पसका गरि ११ वटा टिमको सहभागिता रहेको स्ववियु सभापति कुबेर खड्काले जानकारी दिए । उद्घाटन खेल दिउसो ३ः३० बजे कञ्चनजंगा बहुमुखी क्याम्पस महेन्द्रनगर र सुदूरपश्चिम विश्व विधालयबिच हुनेछ। प्रतियोगितामा विजेताले १ लाख ११ हजार, उपविजेताले ६२ हजार र तृतीयले ३३ हजार, ट्रफि र प्रमाणपत्र प्राप्त गर्नेछ। यस्तै विभिन्न विधाका उत्कृष्ट खेलाडीले पनि नगद सहित ट्रफि, मेडल र प्रमाणपत्र प्राप्त गर्नेछन्।
प्रदेशमा लुकेर रहेका खेलाडीहरूको पहिचान गर्ने र खेलकुदमा युवाहरूलाई जोड्ने उद्देश्यले प्रतियोगिता आयोजना गरिएको सभापति खड्काले जानकारी दिएका छन् । ‘सुदूरपश्चिमका खेलाडीहरूमा धेरै क्षमता छ त्यो झल्काउने गरि हामीले प्रतियोगिता आयोजना गरेका हौँ’ उनले भने ‘खेलाडीहरूलाई व्यवसायीक बनाउने लक्ष्य रहेको छ ।’