काठमाडौं । प्रधानमन्त्री शेरबहादुर देउवाको सचिवालय पछिल्लो समय निकै सक्रिय छ । फेसबुक र ट्वीटरमा मात्रै होइन भाइबर र इन्स्टाग्राममा पनि देउवाका गतिविधि छाउन थालेका छन् । देउवाको सचिवालयले विगतमा उनको नेतृत्वमा भएका कामको प्रचार गर्न श्रव्यदृश्य सबै खालको प्रयत्न गरिरहेको छ । हालै देउवाको आधिकारीक भाइबर ग्रुप हुँदै सामाजिक सञ्जालमा सार्वजनिक भएको एक भिडियोले भने कांग्रेस वृत्तमा धेरै चर्चा कमाएको छ ।
‘मलाई शेरबहादुर देउवा मनपर्छ किनभने’ भन्ने शीर्षकमा तयार पारिएको भिडियो सामाग्रीमा देउवाको गृहजिल्ला डडेल्धुराका कांग्रेस नेता तीर्थ शाहीले आफ्नो धारणा राखेका छन् । उनले देउवाको पक्षमा धारणा राख्ने क्रममा देउवा वीपी कोइरालापछिको दोस्रो महान् व्यक्ति रहेको टिप्पणी गरेका छन् । देउवाको गुणगान उनले यत्तिमै रोकेका छैनन्, उनले भनेका छन्- बिपीले पनि झापा सम्मेलनमा भन्नुभएको थियो, शेरबहादुर देउवा बिना श्रीपेचका राजकुमार हुन् ।
मुलुक संघीय लोकतान्त्रिक गणतन्त्रमा प्रवेश गरेको १३ वर्ष पूरा भइसकेको छ । ‘बिना श्रीपेचको राजकुमार’ भन्ने विशेषण वर्तमान समयमा प्रधानमन्त्रीका लागि उपयुक्त देखिदैन । यद्यपि श्रव्यदृश्य निर्माणमा देउवालाई ‘महान्’ देखाउन प्रयोग गरिएको धारणा अहिले कांग्रेसवृत्त व्यंग्यको विषय बनेको छ । ‘शेरबहादुर देउवाको योगदानको अवमूल्यन गरिनुहुँदैन तर उहाँ बिना श्रीपेचको राजकुमार हो, बिपीपछिको दोस्रो महान् व्यक्तित्व हो भनेर आफ्नै जिल्लाका मान्छेलाई भन्न लगाएर प्रचार गर्नुभनेको गलत हो । यो अलि मपाईत्व भयो कि जस्तो लाग्छ’, भिडियो हेरेपछि कांग्रेसका एक नेताले भने ।