२६ कात्तिक, काठमाडौं । नेपाल टेलिकममा स्थापनाकालदेखि नै कार्यरत २९ जना कर्मचारीलाई राजनीतिक आस्थाका आधारमा हटाइएको भन्दै आन्दोलित भएका छन् । २ दशकभन्दा लामो समयदेखि त्यहाँ सरसफाइको काम गर्दै आएका कर्मचारीलाई टेलिकमले कात्तिक १२ गते कामबाट हटाएको थियो ।
आफूहरुलाई बिनासूचना र सेवासुविधा कामबाट हटाएको भन्दै निष्कासित कर्मचारीले कात्तिक १४ गतेबाट बबरमहलस्थित टेलिकमको कार्यालयमा धर्ना बसेका छन् । आइतबार शान्तिपूर्ण धर्ना बसिरहेकै क्रममा प्रहरीले हस्तक्षेप गरेकोसमेत आरोप लगाएका छन् ।प्रहरी हस्तक्षेपका क्रममा धनु दाहाल, सावित्रा चौलागाईं, लक्ष्मी सारुलगायत घाइते भएका थिए । प्रहरीले धर्नारत १६ जनालाई नियन्त्रणमासमेत लिएको थियो । धर्नारत निष्कासित कर्मचारीले लामोसमयदेखि आफूहरु टेलिकममा सरसफाइको काम गर्र्दै आएको तर, अहिले बिना सूचना आफूहरुलाई कामबाट हटाएको बताएका छन् ।
धर्ना बसिरहेका मजदुरमाथि धरपकड भएपछि संयुक्त ट्रेड युनियन समन्वय केन्द्र (जेटीयूसीसी)ले गम्भीर ध्यानाकर्षण भएको जनाएको छ ।