धनगढी कार्तिक २० , नेपालको विशेषगरी गरी मिथिलाञ्चल क्षेत्रसहित तराई क्षेत्रमा मनाइने छठ पर्व मंगलबारदेखि विधिवत रुपमा सुरु भएसंगै छठ पूजाको तयारी पनि सुरु भएको छ ।
यसैक्रममा धनगढीमा पनि छठ पूजा सेवा समितिले मंगलबार पत्रकार सम्मेलन गर्दै छठ पर्वलाई विशेष रुपमा मनाउने तयारी गरेको जानकारी दिएको छ । धनगढी उपमहानगरपालिका वडा नम्बर २ स्थित मोहना घाटलाई छठ पूजाका लागि सिगारिन सुरु गरिएको छ । पूजा स्थलमा टेण्ट निर्माण, बिजुली बत्ति र रातिका लागि जाग्रमस्थल निर्माण कार्य भइरहेको छ । छठका अवसरमा यसअघिल्ला वर्षहरुमा दुई दिनसम्म मात्रै मनाइने धार्मिक कार्यक्रम यसवर्ष पनि चार दिनसम्म मनाइने छठ पूजा सेवा समितिका अध्यक्ष अध्यक्ष सन्तोष मण्डलले बताए ।
धनगढीको मोहना घाटमा हुने छठ पूजामा विगतका वर्षहरुभन्दा पछिल्ला वर्षहरुमा श्रद्धालु भक्तालुहरुको बढी सहभागिता हुन थालेको छ । तराईबासीले मात्रै मनाउने पर्वका रुपमा चिनिएको छठ पर्वलाई विस्तारै पहाडी समुदालयका मानिसहरुले पनि मनाउन थालेपछि छठ पूजामा श्रद्धालु भक्तजनहरुको सहभागिता बढ्न थालेको देखिन्छ । यस वर्षको छठ पर्वमा मोहनाघाटमा हुने धार्मिक कार्यक्रममा नेपाली कलाकारहरुलाई बढी स्थान दिइएको छ । नेपालमा उपलब्ध नहुने कलाकारहरुलाई मात्रै भारतबाट ल्याइने भएको समितिका अध्यक्ष मण्डलले बताए ।
छठ पर्वको पहिलो दिन नहाय खाय अर्थात ब्रतालुले स्नान गरी अरबा–अरबाइन भोजन ग्रहण गर्ने गर्छन् । पारिवारिक सुख–समृद्धि एवं सन्तानको कल्याणका लागि मनाइने यस पर्वको दोस्रो दिन ब्रतालुले चामल, सक्खर र दूधबाट तयार गरिएको खीर प्रसादको रूपमा ग्रहण गरी खरना विधि पूरा गर्नेछन् ।
तेस्रो दिन छठको मुख्य दिन सौझकारक रहेको छ । यो दिन साँझ अस्ताउँदो सूर्यलाई पूजा सामग्री सहित जलाशय किनारमा अर्घ दिने परम्परा छ । अन्तिम दिन बिहान उदाउँदो सूर्यलाई अर्घ दिएपछि छठ पर्वको विधिवत् समापन हुन्छ । यस दिनलाई पारन भन्ने गरिन्छ । अस्ताउँदो र उदाउँदो सूर्यलाई अर्घ दिन चढाइएको सामग्री प्रसादको रूपमा ग्रहण तथा वितरण गर्ने चलन छ ।
छठ पर्वमा विशेष गरी अर्घ दिन ब्रतालुले ४८ घण्टा अन्न र पानी त्यागेर व्रत बस्ने परम्परा छ । यसकारण छठ पर्वलाई निष्ठाको कठोर साधना मानिन्छ ।